Страшна сообраќајна несреќа попладнево се случи на патот Гостивар-Кичево, во која според неофицијални информации едно лице го загубило животот а 4 се повредени .
Сообраќајната несреќа се случила околу 17:20 часот помеѓу две возила „Рено Меган“ со гостиварски ознаки и „Опел Астра“ со дебарски таблички, на 4 километри од Гостивар во близина не еден од каменоломите. Детали од МВР не се откриваат, а полицијата повеќе информации ќе соопшти по завршување на увидот на местото на несреќата.
Според неофицијалните и првични информации, во тешката сообраќајка животот го загубил возачот на Реното, а со повреди се здобиле жена и дете од истото возило. Две лица од Опелот, според неофицијални информации, исто така се повредени.
Сите повредени лица биле пренесени во гостиварската болница на укажување лекарска помош, но до овој момент нема детали за нивната здравствена состојба.
